تلات تتلات
الموضوع فاق كل الاحتمالات
عارفه انى هتكلم من غير احصائيات واضحة ولا من اى مؤسسة لانى عارفه ان فى ناس كتير اوى
زي حالاتى كده لا راحوا سجلوا شكواهم ولا سجلوا ان فى حاجه غلط بتتم فى مصر
الموضوع زاد عن حده اوى فى عينيا .. يمكن اللى متجوزش او مشافش حواليه ناس اتجوزت كتير ومش متابع اخبارهم هيحس انى بتكلم ف الهوا او انها مجرد حالات فردية لكن لأه مش مجرد حالات فردية
الحقيقة بقى ان مصر اتقسمت تلات تتلاات ومحدش يتريق ع المصطلح علشان انا مش عارفااله نطق غيره
التلت الأولانى : مش عارفين " يحملوا " ومش عارفين سبب او عارفين وبيحاولوا يعالجوه
ولو مش متأكد روح شوف عيادات الحقن المجهرى او عيادات الدكاترة اللى بيعالجوا العقم مليانة ازاى
التلت التانى : واللى انا تقريبا منهم اللى بيحصل حمل اه لكن الحمل مبيكتملش لسبب غير معلوم برضه
بعترف طبعا ان الجهل بالسبب كان سببه جهل دكتورة - ربنا يسامحها - وان كان ممكن اعرف السبب لكن حصل اللى حصل اهو برضه بكمالة جهل الدكاترة اللى عاملين نفسهم دكاترة خلتنى اقعد فى حيرة وشك واضرب اخماس ف اسداس
بين قوسين ) عندى ثقة بالله انه ممكن يحصل حمل تانى ان شاء الله يكمل على خير وساعتها هيتقال ان النوت دى كلها ف الهوا وانها مجرد حالة عابرة ممكن تحصل لكن لا الموضوع زاد عن الحد حواليا انا تقريبا مبقتش اشوف اى اتنين متجوزين الا وفى مشكلة بتواجهم من المشاكل دى
التلت التالت وده التلت المسكين .. اللى بيعدوا المرحلتين الاولانيين بسلام بيحصل حمل والحمل يكمل لكن للأسف البيبي بيبقى عنده مشاكل خلقية بمعنى ادق يعنى تشوهات ما وعلى حسب بقى التشوهات هتيجى ف ايه هما وحظهم او بيبقى عيان زيادة عن الطبيعى ومقاومته ضعيفة جداااااااااا
لو مش مصدقنى فى اللى بقوله تقدر تشوف كل اتنين متجوزين دلوقتى هتلاقيهم تلت من التلاتة دول
اللهم الا القليل القليل ودول بقى ربنا يحفظهم يارب ويكمللهم على خير حتى لو عدوا من التلات المراحل دول ف الطفل الاول .. فمظنش انهم هيبقوا بنفس الحظ ف الطفل التانى او التالت
فى حاجه غلط فى مصر .. يمكن المبيدات فى الخضار والفاكهه اللى المفترض الواحد بياكلهم علشان تبقى صحته حلوة
دلوقتى الواحد بياكلهم وبيعانى من الامراض .. طب ناكل ولا مناكلش
يمكن المياه ..
بدأت اشك ان الحرب القادمة مش حرب اسلحة حرب تشوهات فى الاجنة
شايفاك انت ياللى هناك ياللى بتتريق على اللى بقوله
انا مريت فى فترة ويمكن ذكرت ده ف نوت سابق على السرطان اللى بيهاجمنا وانى شوفت خمسة من اللى حواليا ماتوا بالسرطان وده رعبنى خلانى اقعد فترة طويلة فى حالة اكتئاب واقول ياترى الدور هيبقى على مين ... هما الحقيقة مبقوش خمسة هما بقوا ستة
اللى مش مصدقنى ممكن يشوف عدد الحالات فى مستشفى سرطان الاطفال اللى اعرفه وانا مش طبيبة طبعا ان السرطان ده يعنى خلية ما.. ما بتقومش بوظيفتها وبيحصل خلل وظيفى وبعدها بيحصل ورم ما وبيتفشى اللى عاوزة اعرفه ليه الاطفال يجيلها سرطان وخلاياهم لسه نظيفة وجديدة وببريقها
طيب مستشفى مجدى يعقوب ليه نلاقي 8000 حالة ويتينج هناك
طيب اللى بيروحوا يتعالجوا ف برنامج زى صبايا الخير
وهما اطفال برضه
طيب اللى بيتعالجوا على تكاليف الاورمان
مصر بقت كلها اطفال بتتعالج لـــــــــيــــــــــــه يـــــــا مــــــــــــصـــــــــــــر
انا مضايقة انى بكتب نوت زى دى من منطلق " بشروا ولا تنفروا "
انا مش بفول على حد والله انا مبرضاش اقول لاى واحدة حامل الحقيقة المرة دى علشان مرعبهاش ومبقاش بفول عليها كل اللى بقولهولها لما بلاقيها بتعانى من مشاكل غير طبيعية ف الحمل انى انصحها بالسونار الرباعى علشان تطمن على نفسها وعلى البيبي وتعرف المشاكل اللى بتواجهها أثناء الحمل دى سببها ايه
انا كاتبة النوت ده مخصوص لزملائي الاعلاميين ربما حد يهتم ويفتح الملف ده
لازم نعرف ايه اللى بيواجهنا ونعالجه لو مبيدات تتوقف لو ميا تتعالج انا عارفه ان مصر فيها فساد كبير ف الحكومات وان الموضوع هيتكتم عليه علشان مسيرة تشوهات الأجنة تكمل وميبقاش في جيش بعد تلاتين اربعين سنة يقدر يحارب العدو ... ومحدش يقولى انى خيالية وانى بؤمن بنظرية المؤمرة وان مفيش مؤامرة لا فى مؤامرة بقى
اللى انا بشوفه حواليا ده مش طبيعىىىىىىىىىىىى
ملحوظة : انا مش كاتبة النوت ده للمواساة وربنا يعوض عليكى ومعلشي وهى مجرد مرة وان شاء الله الجاى احسن والكلام اللى ظاهره حلو ده بس باطنه بينكد ع الواحد انا الحمد لله مريت الازمة دى ومبحبش كلام المواساة ده بجد بيخنقنى ومش كاتبة الموضوع ده لمجرد عرض حالتى الشخصية انا كاتبه علشان بجد نفسي الملف ده يتفتح ويتناقش ويبقى فى وسيلة لعلاجها يمكن تتعالج يمكن يجى حد بيحب البلد دى ويشوف مشاكلها ويعالجها وعلى طريقة عادل امام فى حلوان اضربت لازم نعترف ان مصر كلها اضربت والجيل بقى تعبان حقيقي وهزيل فى انه ينجب طفل سليم معافي ... اللهم الا القليل ربنا يحفظهم ويحميهم يااااااارب ..... المشكلة ما بتتحلش الا لما يحصل اعلان بالمشكلة انا متاكدة ان كل واحد بتتعالج فى صمت والدولة ملهاش اى دور فى تسجيل حالات والاعتراف بأن فى مشكلة حقيقية
لازم كلنا نقول آآآآآآآآآآآآآآآآآآآآآآآه على طريقة عادل امام فى فيلم " النوم فى العسل
هدى حسن
كتبت بتاريخ
19-1-2014
No comments:
Post a Comment