حادثة الموتوسيكل

الحادثة 6/11/2007 يوم الثلاثاء الساعة 9 صباحا

بالعجوزة أمام مستشفى العجوزة

وأنا ف الطريق إلى التدريب الميدانى بتاعى بمدرسة القومية العربية

خبطنى موتوسيكل

أنا اينعم طبقته والراجل راح يخرط حديده وقلبه بسكلتة!!!!!

أنما مين فينا الغلطان؟؟؟؟ الله أعلم

بس يكفى انه خبطنى وجرى علشان يكون مدان ف نظري

نتج عنه كسر ف رجلى اليمين وكدمات ف بقيت جسمى وكدمات مركزة ف ركبتى اليسرى

ده الكلام اللى ملوش لازمة

خلينا ف المهم ألا وهو:

احساس مش هنحسه أبدا الا ف وقوعنا وقت المصايب

ربنا ميكتبها على حد ابدا

انا اتردت كتير ف كتابة البوست ده

بس اللى جمد قلبي انى فكرت شوية كتير

ف الناس اللى عرفتهم على حقيقتهم

سواء الحلو أو الوحش

ف لموقف ده بالذات

يا ترى كل واحد فينا محتاج موقف زى ده علشان يعرف مين أكتر الناس ممكن تقلق عليه

ومين ينفض وميهمتش ويعمل نفسه مش واخد باله؟؟؟؟؟؟؟؟؟

ياريت تجاوبونى

الأيام دى بالذات حسيت اد ايه انا متكتفة وأد ايه انا مخنوقة

أد ايه انا محتاجة لزيارة أى حد يعرفنى علشان احس انى لسه عايشة بشوف ناس وبتكلم مع ناس

بجد انا لما كان حد من اصحابي بيجى بنسى التعب خالص

وأول مبيمشوا كل الوجع يرجع ينئح تانى عليا

ده مش معناه ان وجعى تمثيل

بس فعلا فرحتى بوجودهم واهتماهم كان أكبر من ألم الحادثة

قضيت بتاع عشر ايام او اكتر محدش عبرنى بزيارة

كنت كل يوم أعيط لحد ما عينى تنفخ

خصوصا ان أقرب أصدقائي مسئلوش فيا الا فييييييييييين

لما قربت أخف اساساً

مش مهم انا مسامحاهم المهم انهم جهم وشوفتهم شوية

على اد منا كنت مضايقة جدا من حدوث الحادث ف الوقت ده بالذات وان شغل الكلية كله اتعطل

وبقيت بصرخ ف المستشفى وانا بقول شغلى

لدرجة ان الدكاترة افتكرونى بشتغل

واستغربوا لما عرفوا انى لسه طالبة جامعية وبصرخ على شغلى

انا كنت بقصد العملى بتاعى طبعا اللى مصيره العطلة والفشل

على اد منا دلوقتى بعد ما أدركت الموقف بحمد ربنا

بحمد ربنا بجد

وندمانة انى محمدتش ربنا من اول لحظة

فعلا ندمانة على كل لحظة انا بكيت فيها من جوايا وصرخت على وقوع الحادث نفسه ف الوقت ده

بحمد ربنا ان الموضوع كان هين جدا يعنى كسر مهما ان كان مش حاجه دايمة والحمد لله

ولا عاهة مستديمة اعيش بيها بقية عمري

ربنا لطف بحالى والحادثة دى بيذكرنى بحاجات كنت هملاها وبيقولى بالحادثة

دى خلى بالك

العمر ف لحظة هيختفى

انا عارفه طبعا

انى مخرجتش من الحادثة دى رابعة العدوية وزى منا تقريبا

بس على الأقل في حاجات كتير افتكرتها فى وقت كان لازم افتكرها فيه

اللى هى ايه بائه

خليها بينى وبين ربنا

يا بلوجرز انا مش بحكيلكم الكلام ده علشان حلقة نكد وكده

ولا علشان ف الاخر حد يرد ويقول طب وانتى بتشكيلنا همك ليه دلوقتى

انا عاوزة بس كل واحد يكتب ورقة فيها اللى عليه قبل اللى ليه

ويحاول يحاسب نفسه دايما

وفعلا ميستهونش بأى بنى ادم انه بعيد او ان ملوش لزمة ف حياته

لأن البنى آدمين اللى مش على بالك خالص

هما دول اللى بيسألوا عليك وقت الشدة فعلا

والناس اللى بتنتظر أنهم هيقلقوا عليك وكده علشان انت بتحبهم والحوارات دى هما دول الناس اللى ممكن يخذلوك لو كانوا مصلحنجيا

أكتر ناس بائه ليس عليهم خلاف بأنهم أقرب الأقارب من قلبك

هما أهلك

أكتر ناس بتحس بوجودهم وخوفهم عليك

ده برضه بقوله لكل اللى نفسه يتغرب

لو اتغربت فعلا

وبعدت عن اهلك وناسك

هتعمل ايه ف موقف زى ده

انا اول اربع ايام كانوا اهلى بيشيلونى يدخلونى الدبليو سي ويجيبونى منه تانى

و أول اسبوع كانوا بيشيلونى يودونى المستشفى

مين ممكن يشيلك لو انت ف غربة بعيد عن اهلك

الأهل....الأهل ..... الأهل...... الأهل

اوعى تبعد عنهم

اوعى تزعلهم

حتى لو زعلوك ف يوم

هما اكتر ناس بيزعلوا عليك بجد

مش هقول أكتر من كده

وان كان واجب عليا انى اقول

فهخص بالذكر

آية إمام،،،،

اللى بجد بجد بجد

انا مبهدلاها معايا

واللى فعلا أول حاجه افتكرت انى احمد ربنا بعد الحادثة مباشرة

انى قولت الحمد لله ان "أية " مكنتش معايا ف الحادثة دى علشان ميجرالهاش حاجه

مكنتش هستحمل لحظة ألم تعيشها بسبب انها كانت معايا ف الوقت ده

ربنا يحرسها دايما

بحبــــــــــــــــــــــــك يا "آية"

ومش هقدر انسى

حسام الدين مصطفى

زميلى ف جامعة الأزهر

بس هو تعب قوى علشانى

وف ايام امتحاناته

ربنا يوفقه يارب

بهدلته معايا بجد وايام امتحانات دى

احترمته جدا

وحسيت اد ايه هو راجل وجنتل مان على حق

هو طالب ف الحسين الجامعى

وعملى اشعة على ركبتى التانية وسونار

وبجد التفاصيل اللى ف الموضوع بتقول انه حد يستحق الاحترام والتقدير

واستريحت نفسيا

ان فى ناس ممكن تشوفك تلات مرات بس ف حياتهم

دى المدة اللى اخدنا فيها سوا كورس تبع الجامعة

ويخدموك ويجروا على مصلحتك ف وقت هم ف امس الحاجة انهم يستريحوا من سهر ذاكروا فيه

او امتحان تعبوا فيه او وقت محتاجينو علشان يناموا او يذاكروا فيه

وان فى ناس لسه معندهاش مصلحتى أولا

اكيد انتو متحبوش تنسوا حد استحملونى مكسسورة وليس عليا حرج

ارغى زى منا عايزة

طفولتى المشردة

انا فاكرة ان طفولتى كانت بريئة ...

يعنى مكان متحطنى بعد ساعتين تلاتة اربعة هتلاقينى زى منا

مكنتش بنكش ف حاجه خاااااااالص

بس طول منا جوا البيت

أول مبدات اتعلم انى العب ف الشارع والتفاعل مع اطفال آخرين

ظهرت بوادر التشرد عليا ,,

يعنى كنا بنروح ع البلاعات ونصطاد أكبر كم من الضفادع

ده علشان بيتى حواليه كله جناين ف البلاعات مليئة بالضفادع

تصدقوا إن حتى الضفادع دى سمة من سمات زمان انا دلوقتى مبسمعلهاش صوت

ده كان بالليل يعنى السواريه بتاع اليوم

بالنهار بائه كنت بخرج الشارع برضه بس بصطاد دبابير واحطهم ف كيس نايلون

وياسلام بائه لو اصطدت دبور ملون ده يبقى نجمة ذهبية ..ده من على الزرع برضه اللى حوالين بيتنا

وبرضه كنت بروح أأجر عجل (بسكلتة يعنى كنت كل يوم اروح ل ماما تحت ركبتى متعور وعند الرسغين كده مكان مبسند وانا بقع من العجلة

كل مرة أأقع ده( اصلى اتعلمت ركوب العجل بالعافية)

لو سألتونى بتميزى ساعة المغربية بإيه هقولكم بـ"عربية الرش"و

اذبهلوا بائه وقولوا بطريقتكم المعتادة عربية الرش؟؟؟؟ وكأنى قولت بدعة

عربية الرش دى بتاعت الناموس

بتطلق جاز أبيض كده مميز الرائحة كنت بعشقه

هى تيجى من هنا وانا اجرى وراها انا وبقية العيال واقعد استنشق واشد واخد على صدرى كل هواها الأبيض اللى انا شخصيا كنت مغرمة بيه

أما بائه وقت الدراسة فكنت غلبانة قوى مش بنزل الشارع طبعا علشان اجرى وراها بس اول مسمع صوت الموتور بتاعها المميز واللى بيجيب الصداع لا محالة للى قاعد بيظبط اتجاهها

كانت ساعة عيد بالنسبالى

اجرى ع الشارع وافتح الشباك

والهوا يطلعلى لحد عندى الرابع وانا اقعد اشد واخد نفس واتنين وكأنى بشم برفان لافندر ولا حاجه

وبمناسبة الشم والشد والنفس

افتكرت الكولة

عارفين الكولة الغراء الأحمر

فعلا ريحتها تنعش

ماما كانت بتجيبها تلزق بيها الجلود وكده

اول متمشي وتروح الشغل

انزل من تحت البطانية واجرى على ازازة الكولة

وكأنى بلهث على الرضعة مثلا

بس مكنتش اعرف والله انه ادمان ومكنتش بسكر من ريحتها بس كنت بحب ريحتها قوى

وشاء الله انه ميحرمنيش منها حتى بعد مكبرت

دخلت كلية بستخدم فيها الكولة علبة أو اتنين ف الاسبوع الواحد

وبمناسبة الكولة والكلية ف يوم ف رمضان روحت اشترى الكولة بس المحل اللى انا كنت متعودة اشترى منه

كان قفل خلاص وكنا ف رمضان وانا كنت محتاجة علبة جدا

قولت عليا وعلى اعدائي بقيت بسأل عليها ف كل مكتبة حتى محل المنظفات قولت يمكن تكون عنده كولة

ده ب اعتبار ان الكولة مشروب رسمى زى البيبسي والكولا كده هلاقيه ف كل المحلات

انا كان ناقص ادخل صيديلة واقولهم عندكم كولة؟؟

طبعا الموروث الشعبى عند المصريين ان الكولة دى احدى أدوات المخدرات غير كده الناس متعرفشي يعنى ايه كولة

روحت زى المحترمة علشان الموروث ده لما بسأل عليها

بقول: لو سمحت عندك شعلة اسبانى؟

الراجل كتر ألف خيره مفهمشي يعنى ايه شعلة عنده حق مهو بتاع منظفات برضه انا اللى غلطانة

قالى: يعنى ايه شعلة؟؟؟ بطيبة كده وسذاجة مازلت أتذكرها

قولت ف عقل بالى مبديهاش بائه لازم اواجهه بالحقيقة المريرة قدام الزباين اللى عنده

قولتله: يعنى عندك كولّة؟؟؟

الراجل رجع خطوتين للوراء مش هقول للخلف علشان تناسب مستوى الكولة

وفنجل عنيه الاتنين وكأنى سألته عن قرش حشيش أو نطقت كلمة السر وقولتله اتصرفلى ف حتت استافا يا معلم

وقال جملته اللى مش قادرة انساها أبدا:

استغفر الله العظيم يارب

كانت معايا صحبتى "أية" هحكيلكم عنها كتير بعدين لأننا مبنتفارقش تقريبا عاملين زى التوأم الملتصق

وقولتلها ب علو صوتى قبل الفطار وقدام الزباين والبياع

يعنى لازم سيادتك تشدى علبتين كولة كل يوم ادينا مش لاقيين دلوقتى

وفوريرة من قداهم واحنا ف هستريا من الضحك

ونلعن ف الكلية

نرجع بائه لموضوعنا تشرد طفولتى اوعوا تكونوا نسيتم الموضوع الأصلى مش التايوانى هع هع

غير بائه تسلق الأشجار برضه:

كانت فى شجرة توت قصاد بيتنا على فكرة التوت ده كان أخضر ونيي قوى عمرى مشوفتلها توت مستوى ومع ذلك كنا بنتسلق الشجرة علشان نقطف التووت وناكله ،،، ومرة ماما قفشتنى كان يوم اسود عليا وحرمان من نزولى الشارع

وبمناسبة ماما واليوم الاسود اللى كان على دماغى كنت وانا صغيرة كان نفسي اعمل عروسة قماش قوى كانت جارتنا كل يوم بتطلعلى ب عروسة قماش انا كانت عروستى من اللى بتضحك وتعيط بس مش عارفه ليه العروسة القماش كانت تزغلل عينى قوى ونفسي اعملها طلبت من ماما كتير قماش علشان اعمل العروسة وهى كانت بطنشنى بائه ..أو بتنسى ...مش حاطة ف دماغها ...المهم جيت ف يوم لقيت قماش أزرق مش عاوزة اقولكم اللون ده فى علاقة بينى وبينه اد ايه لحد النهاردة قررت ان عروستى تبقى لونها أزرق وقصيت القماش وماما جت من الشغل لقت فستانها اللى كانت ناوية تفصله ياعينى مقصوص على هيئة عروسة ماما مسكتنى ادتنى علقة محترمة ومكتفتش بالعلقة دى الحقيقة كل متشوف القماش او الفستان اللى اتقصقص تدينى علقة زيها والله انا واثقة انها لو شافت الفستان ده النهاردة تانى وانا أناهز من العمر 21 سنة.. لتمسكنى تدينى علقة تانى

فى حاجه بجد بائه افتكرتها دلوقتى من ايام التشرد انا كنت عنيفة قوى بسبب ان اخويا اللى اكبر منى ب 8 سنين كان بيضربنى كتير عمال على بطال كنت بخرج اضرب أى ولد ف طريقى يقوللى تلت التلاتة كام فى يوم اتخنقت مع ولد والبوكس الوحيد اللى اداهونى طيرلى فردة حلق من ودانى بس لقيتها بعد كده روحت اسأل العيال اللى بيلعبوا تحت العمارة دى لقوا فردة الحلق ولا لأ وطلعت واحدة منهم لقيتها ورجعتهالى:
صحيح.. هو ليه واحنا صغيرين بنشوف ناس تلاقى دهب وترجعه لصحابه؟؟؟

ياااااااااااااه تشرد بجد أى خدمة جبتكلم بلاويا السودا كلها

هاه مين عنده بلاوى سودا .. يجى ويحكيلنا عنها ؟

الكلام ده كله هتلاقوه على الفيس بوك
فى جروب حلو قوى
http://www.facebook.com/topic.php?uid=2385863183&topic=2859
انضموا ليه

واتمنى ان كل بلوجر هنا يقرا البوست ميمشيش الا لما يحكى طفولته المشردة كانت ازاى
ويقولى رأيه ف طفولتى اللى كانت كلها رقة ووداعة
21\11\2007

ايه اكتر حاجه تافهة ممكن تعملها؟؟؟

مش عارفه احكيلكم الاول ولا اسئلكم الاول المهم هسألكم سؤالى بس بعد متقراوا الحوار اللى دار بينادار حوار بينى وبين صديق

وكان

الحوار على الشات كالآتى:

صديقى: بس خلصت امتحانات

صديقى: عاوز اعمل اي حاجةغير مفيدة

أنا: ازاى

صديقى: اي حاجة تافهة

أنا: يااااااااااااااااااااااااااااااااااااااااه

أنا: تصدق انك نجم

صديقى: اه و الله

صديقى: ليه

أنا: علشان خلتنى افكر ف ثانية ايه الحاجه التافههة اللى ممكن تعملها

صديقى: ايه؟؟؟؟؟؟؟؟؟؟؟؟؟؟؟؟؟؟

أنا: لقيت ان كل حاجه ممكن نستفيد من واراها

صديقى: اشجيني

أنا: يعنى لو قولتلك اخرج

أنا: ف الخروج افادة

أنا: وترويح عن النفس

أنا: ورؤية وشوش جديدة

صديقى: انا اكيد خارج

صديقى: بس علشان اظبط بكرة

أنا: كنت هقولك اضحك وخلاص ف لقيت ان الضحك بيعالج حاجات كتير قوى

أنا: فقولت طب اقولك تعيط

أنا: ف لقيت ان العياط بيخرج طاقة مكبوتة ممكن تمرضنا لو مخرجتش:

أنا: كنت هقولك عاكس بنات:

صديقى: لالالالالالالالالالالالالالالالالالالالالالا

أنا: ف لقيت ان ف معاكسة البنات هتقدر تحلل سيكولوجية بنت قد تكون مشوفتش سيكلوجيتها قبل كده

صديقى: انا مؤدب

أنا: كنت هقولك دخن واهو التدخين تافه ف لقيت ان الصحة تاج على رؤوس الأصحاء لايراه الا المرضى وبالتدخين هتعرف قيمة الصحة وقيمة حياتك قبل متدخن

أنا: يعنى كل حاجه بنعملها مفيدة فى خبراتنا الحياتية

صديقى: ايه الجمال ده

صديقى: و الله اديبة كبيرة

أنا: وعلشان كده بقول انك نجم

صديقى: مرسيييييييييييييييييييييي

صديقى: اصل انا حاسس انك حتبقي مشهورة

أنا: ان شاء الله

بس دى كانت وجهة نظرى طب لو سالت كل بلوجر هنا دلوقتى ايه الحاجه التافههة اللى ممكن تعملها هتقول اييييييييييييييييييييييييه ياريت الكل يرد وميطنش الموضوع جامد ومحتاج ردود مستنياكم

وزى معودتكم ان كل موضوع هنا بحطله لينك عليه تعليقات كتيرة ف نفس الموضوع هضيف هنا اللينك ولقيت تعليقات ظريفة قوى

هتعجبكم ان شاء الله

ياريت تدوسوا على اللينك وتشوف الصفحات بتاعت الموضوع كلها

http://www.haridy.com/ib/showthread.php?t=82460

حلل شخصيتى... برسمى

بداية جتلى فكرة ف بالى انى اعرض رسمتين ليا هنا رسمتهم

واحد ببرنامج الرسام وده رسمته النهاردة

وواحد بخلفية من على برنامج الياهو بتساعد على الرسم اثناء التشات بس بامكانيات اقل بكتير من برنامج الرسام.

...فى علم تحليل الرسوم...

يمكن مننا كتير ميعرفوش

ومش كتير هنا ف مصر يعرفه..

حتى لو كان سمع عنه انما تحليل تحليل نادر قوى

بيستخدموه اثناء الحروب او فى تنفيث الكبت النفسي لدى الطفل

انا مش طفل طبعا بس الرسم عند اى سن اكيد بينفث عن كبت وبيخرج مشاحنات داخلى

1-تقريبا وتاريخها 1/4/2007 رسمة الصياد دى كانت بالياهو بخلفية اسمهاdoodle

،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

أما الرسمة اللى هحطها دى رسمة الجنينة فدى رسمتها النهاردة20/8/2007

لو حابين تشوفوا تعليقات وتحاليل لرسمى ف اللينك ده

http://www.haridy.com/ib/showthread.php?p=1081095#post1081095

ياريت تحللوا شخصيتى

والميكروفون معاكم

حوار مع المذيع المتألق"أحمد عبدون"

شوفتو بائه ده مش موضوع واحد اللى هنزله ف يوم

لأ موضوعين كمان

مهو الفقى لما يسعد (*_*)

الموضوع التانى

حوارى مع المذيع المتألق "أحمد عبدون"

بس ياريت تقولولى رأيكم بجد

ليا مستقبل ولا ايه

انا للأسف معملتش حاجه بعدها

ربنا يسهل

ادعولى ارجعلها تانى

بس ب شغل جامد

المشكلة ان كليتى عملى ومفيش وفت خالص

ولما صدقت واخدت اجازة حسيت انى عاوزة انطلق وبقيت كسلانة كده

عاوزة احل مشكلة الكسل

على فكرة من صفات العذراء برضه انه كسول ونفسه قصير ومبيكملشي ف حاجه

لأن مواهبه بتكون كبيره عليه ومودى تلاقيه عمل هنا حاجه وسابها وكمل ف حاجه تانية

وبما انى برج العذراء بالمسطر ف دى إحدى عيوبى اللى مش قادرة اتخلص منه

المهم اسيبكم انا ف آمان الله ولنا لقاء قادم إن شاء الله

ادعولى من قلبكم

عايدة سعودى..... حبيبة قلبي

أنا مرجعتش بـ جديد

بس لازم ارجع

انا طولت الغيبة قوى وكل فترة ارجع اقرا اللى كتبته وانا سعيدة بيه انى كتبت حاجه عن نفسي لأول مرة

بس لاحظت حاجه

انى كلمتكم عن حاجات وانتو متعرفوش حاجه عنها ...مجرد السمع بس وعلشان كده انا نويت والنية لله انى ارجع لتفاصيل صغيرة

يعنى مثلا كلمتكم عن شغلى ف الصحافة رغم انى موريتلكوش حاجه منه

كل مهلاقى حاجه هعملها سكان واعرضهالكم

بس ف مقابل كده

انكم تقولولى رأيكم برضه متحبطونيش

ارجوكم

اولا حوارى مع "عايدة سعودى" مش هوصفلكم اد ايه انا بحبها لأنى واثقة انكم بتحبوها

ولو مشوفتش صحصح معانا لازم تتابعها وهتحبها انا واثقة من اللى بقوله وعارفة انا بقول ايه

ليه.....كركوبة؟؟؟؟؟

انا سميت نفسي كركوبة

مش عارفه ليه بس حسيته

وبصراحه جه ف وقت جدتى اتوفت فيه فحسيت انه نوع من الوفاء ليها لأنها كانت عجوزة قوى وبحبها قوى

تحس ان الكركبة فيها عبق الذكرى

انا عن نفسي مبعتبرهاش كركبة بس الناس التانيين ممكن يعتبروا أى حاجه على انها كركبة انما انا بعتبرها شاهد عيان على ذكرى جميلة ف حياتى حتى لو كانت ذكرى مؤلمة،،،

وكل مالحاجة مر عليها زمن مرت عليها خبرات حياتية....

وبتتحول من كركوبةالى اروبة

وف نفس الوقت لأنه جه ف وقت كنت مكتئبة فيه( مكتئبة مكتئبة يعنى) مش بهزار و وفاة جدتى كمل اكتئابي ف لاقيت نفسي كركوبة

بس على فكرة انا ف أماكن كتير بكون كركوبة وأماكن تانية بكون doddosh دوددوش اللى هو اكتر دلع حبيته على ودانى وينفع يتكتب

اتمنى تكون دى أجابة سؤال ناس كتير

ليه كركوبة؟

بادئ ذى بدء

وزى مبيقولوا الناس الجهابذة ف بداية أى موضوع يوحى انه مهم
لازم يقولوا كلمتهم الشهيرة:

"بادئ ذي بدء"

وعلشان أنا قولتها بكل جراءة
فهقول برضه ان ده مش بس بداية موضوع لأ
ده بداية مدونة بحالها
يعنى مواضيع كتيييييييييييييييييرة_ ان شاء الله ـ
وربنا يوفقنى ف المدونة دى وأكون عند حسن ظنكم
طبعا هتقولولى واحنا نعرفك منين
لو تحبوا ممكن اعرفكم بيا بتفاصيلى الصغيرة جدا
علشان تعيشوا معايا لحظة بلحظة كانت أو ستكون

...ايه الكلام الكبير ده ...ماعلينا

اسمى هدى بنت شقية دلوعة اخر العنقود ويكبرنى اربع اخوة الاكبر يكبرنى ب 15 سنة وده بائه بالنسبالى كان حكاية كنت بحبه قوى وانا صغيرة لدرجة انه لو قبّل اختى(باسها يعنى) اعيط انا فيها ويجى بالليل بائه واقعد ادعى ربنا انى اصحى تانى يوم والاقيه مش اخويا ويحبنى ويتجوزنى واستنى بكره يجى وملاقيش الدعوة اتحققت وازعل قوى انه لسه اخويا واقول لربنا ( بكل سذاجة) :مش انا بدعيلك امتى تحققلى دعايا !!!....."..

اخويا اللى بعده بائه اكبر منى ب 12 سنة على فكرة هو فعليا أحن واحد فيهم بس كان دايما بيشخط ويزعق وده كان بيخوفنى منه ويخلينى اتخانق معاه كتير بس لما كبرت وعرفت افرق مين اطيب من مين لقيته أطيب واحد واللى فيه ده جعجعة ع الفاضي

اختى اللى بعديهم بائه اكبر منى ب 9 سنين بس بجد دى مامتى مش مجرد اختى وصديقتى وسترى وغطايا اتعذبت والله ومعشتش طفولتها بسببي كانت مامتى من وهى عندها 9 سنين ... منكرش انى مفترية ولو كنت مكانها كنت رمتنى ف اقرب زبالة ورحت العب .. وده ذنبها هى اللى طلبتنى من ماما وقالتلها انها عاوزة بنت تلعب بيها ولو جه ولد هترميه من الشباك أراد الله انها مترميش اخوها من الشباك وجيت انا ..وهى كمان متنكرشي انى بعد مكبرت علمتها الفساد والميكاب
كانت غلبانة ..... يلاّ منى لله

اخويا اللى أصغر منها بائه اكبر منى انا ب 8 سنين وده كان اخر العنقود بتاع البيت قبل منا آجى البيت ادلع 8 سنين وحتى مبعد ما جيت كان هو اللى بيدلع وهو اخر العنقود وكان حططنى ف دماغه بشكل عجيب وانا وهو خناقات وخناقات وخناقات وضرب وتلطيش ونتخاصم بالسنة الكاملة ومفيش فايدة لحد ماتجوز وخرج من البيت عرفت بعدها انى اخر العنقود وبقيت بستغرب من الدلع اللى كان مختفى هو مكنش مختفى تماما الحقيقة انا كنت واخدة وضعى الحقيقة كفاية انهم كانوا دايما بيشجعوا مواهبى وموقفوش ف طريقى وكانوا بيساعدونى ويسيبونى انطلق منكرش فضلهم عليا وانى لو كنت ف بيت تانى كان أكيد هيحجر عليا وعلى طلباتى انا كنت بدلع عليهم بس بطريقتى هما دايما كانوا بيقولوا : هدى مدلعة نفسها مش مستنيه دلع॥ علشان ندلعهولها।بس الشهادة لله أختى كانت مدلعانى قوى قوى ولحد دلوقتى كمان مدلعانى وبدلع عليها ودلعى مرئ كمان وعلشان مكنش ظلمت اخويا اللى أكبر منى ب 8 سنين واكون مصوراه وحش كاسر هو الحقيقة غلبان وطيب ودمه شربات ويمكن دى الصفة اللى انا اضمنهالكم حتى واحنا متخاصمين لو كان اتكلم وانا قاعدة مبمسكش نفسي من الضحك
بس انتوا عارفين غيرة الأخوات بائه بتعمل ايه ف البيوت... بتولعها نااااااااار

مجبتش سيرة بابا وماما ... جاحدة أنا ،بدأت باخواتى بس ده علشان هما الخير والبركة من غير كلام مكانهم محفوظ.... وبلاش نجيب ف سيرة الناس الكوبّارة

وفى اخوات ليا مجبتش سيرتهم لحد دلوقتى ... ايه ده اخوات وبابا وماما مجابوش غيرنا!!..... اه اخوات انتوا نسيتوا اصحابى اللى ف المعهد دول اخواتى برضه وقضيت معاهم وقت اطول من اخواتى نفسهم على رأى مدرسينا احنا بنقضى ف المعهد ست ساعات ونروح البيت ناكل وننام ونذاكر وننام زيهم ست ساعات او اكتر والتفاعل الحقيقى مع اصحابنا دول وده احنا آمنا بيه وصدّقنا عليه وانا على ثقة انك لو دخلت اى فصل او مدرج أزهرى هتحس بشئ مش هتحسة الا جوانا احنا ( طيبة، وحب،واخوة بجد مفيش من وراها أقنعة) لو عاوزين تعرفوا السر ممكن اقولكم ده من تحليلى الشخصى.. وادى تشميرة كم علشان الحوار لسه هيطول ف الشرح ..متذبهلش كده وتتخض انت اللى وافقت وقرأت من البداية وانت عارف ان البنات مبيتسلمش من رغيها
ندخل ف الشرح العبقرى:

احنا عندنا ف المعهد بتاعنا 6 سنين ابتدائي بعدهم تلات سنين اعدادى بعدهم تلات سنين ثانوى ودول كانوا من كام سنة اربعة كمان مش تلاتة بس السنين دى كلها ف نفس المعهد مبتغيروش واصحابك هما هما وشك ف وشهم السنين دول كلهم ضيف عليهم انا كحالة خاصة قعدت سنتين ف اولى ابتدائي سنة منهم اسمها مستمعه بدل كجى تو.. أصل ماما كانت عاوزة تخلص منى بدرى واحنا عددنا قليل جدا يعنى كان فصل واحد علمى ف الدفعة وفصل واحد أدبي ف الدفعة وجنب بعض يعنى اللى اتفرقوا بعد تالتة اعدادى بنتسرسب ونتقابل بين الحصتين يعنى مبعدناش كتير انما بائه التعليم العادى اللى هو تربية وتعليم بائه بيربي ف الطفل من وهو صغير اللامبالاة وان زميله النهاردة مش هيشوف وشه بكره .... ازاى ؟؟؟ اقولكم انا
تربية وتعليم ف مدارس ابتدائية بس او ابتدائية واعدادية مع بعض
هنفرض انها ابتدائية بس يعنى خمس سنين بس هيقضيه مع زميله وبعد كده كل واحد على مدرسة اعدادى قد تختلف هيدخل اعدادى ومجموع اعدادى اللى فيهم بيدخل مدارس صناعى او تجارى او ثانوى عام وحتى لو دخلوا ثانوى عام ففى عندهم علمى وأدبى ولو دخلوا علمى عندهم علمى رياضة لوحدة وعلمى علوم لوحده احنا شامل يعنى اللى هيدخل علمى هو فصل يتيم وفصولهم كتيييييييييييييييييييييييييييير يعنى حتى لو اتنين دخلوا علمى نفس القسم مش هيكونوا مع بعض بسبب الاسم او بسبب ان عنهدم فصول متفوقين احنا معندناش كلام الهبل ده احنا بنتعامل افضل معاملة معندناش عنصرية ولو فرضنا انهم اتقابلوا ف الفصل فبعد تلات سنين بتوع الثانوى برضه هيتفرقوا علشان عندهم معاهد كتير وجامعات كتير وكليات كتير... اللهم لاحسد
احنا بائه جامعة يتيمة ف مدينة نصر كلنا لسه بنشوف بعض ونركب سوا المواصلات وكام كلية يتعدوا ع الصوابع مش عاوزة اقولكم ان المبنى اللى انا فيه فيه كليات كتير قوى طب اسنان وعلوم وكليتى اللى هى دراسات انسانية شعبة طفولة وكلية دراسات اسلامية بأقسام رغم ان عندهم مبنى مستقل بذاته وجغرافيا وتاريخ وحاجات وشريعة واصول دين..

... يعنى ظيطة.. كل ده ف نفس المبنى ..مش بقولكم مبنتفرقش ابدا..اللهم لاحسد.. وده كان تحليلي الشخصي ف سبب اننا علاقتنا ببعض مش شبة علاقات أى زملا تانيين

نرجع تانى للبنوتة اللى اسمها هدى اللى هى أنا اوعى فكرك يروح لحد تانى..اصحى معايا.. متوهشي منى وحياة السيد الوالد عندك..البنوتة اللى بتشيل هموم مش عارفه بتجيبها منين ( برج العذراء ) بائه ومناخدش عليه هو كده بيتشاءم كتير
بس والله مش تشاؤم هو بحث عن المثالية مش أكتر
وبتصدم لما ماوصلهاش او ميوصلهاش غيرى واحس انه كل اللى بعمله ماهو الا : nothing
تعليمى أزهرى ومن وأنا صغنتوتة كنت بفرح قوى لما حد يسألنى وأرد عليه بتناكة واقوله إنى أزهرية
كنت بفتخر قوى لكونى انتسب للتعليم الأزهرى
وبصراحة معهدى هو أكتر شئ خلانى احترم الأزهر
من مدرسين واخصائيين واصحاب اللى هما اخواتى طبعا..مش مجرد زمايل، قضينا مع بعض حوالى 13 سنة عشرة عمر بائه
مش عارفه اوصفلكم ازاى اد ايه معهدى لازم ابوس كل حبة رمل فيه
وعلى قد منا بحبه على قد منا بكره جامعتى جدا ومن اول يوم دخلتها فيه
لأنى كنت بتعامل باحترام شديد جدا ف المعهد انما ف الجامعة موظفين الشئون دول مش بس يكرهوك ف الجامعة ده يكرهك ف كل حاجه ف الدنيا ومعاملتهم الزبالة ده غير انه نظام يقرفك من الحياة اللى بيطبق عليك
وكأنه بيعاقبك على أنك جوا دايرة نظامه

يلا حسبي الله ونعم الوكيل ف كل موظف او بنى آدم مبيراعيش ربنا

بس برضه بحب زمايل الكلية قوى وبجد بجد هما زى اخواتى وانا زى اختهم ودى حالة كده صعب قوى تلاقيها خارج جامعة الأزهر

......

وموهوبة كمان
بكتب قصة قصيرة من وانا ف خامسة ابتدائي حقيقى والله
والحمد لله لقيت الناس اللى قدرت انها تطور من كتاباتى
وبقيت "هدى حسن" القاصة
بس بصراحة وصلت لأولى جامعة واتقتلت كل مواهبى ومكتبتش قصة بعدها هى جامعة تقتل كل شئ جميل جوايا بس والله قابلت دكاترة زى العسل وهونوا عليا الغربة كتير
بس ف الاخر انا موجوده ف كلية وجامعة تعبانة نفسيا منهم
يعنى عادة اللى بيدخل علمى وشامل كمان بتكون طموحاته موجهه للكليات العلمية اكتر
انا جبت اه 88% تقريبا بس ده مخلانيش احصل علوم على سبعة من عشرة ف المية
ورقصة ع السلالام لانا موجوده ف مكان اللى جابوا تسعينات ولا انا لعبت وريحت دماغى زى اللى جابوا سبعينات وستينات وف الاخر اتسويت بيهم
فكانت معاناة

وربنا يسامحهم.. قسم علوم قصادى ف نفس المبنى ونفس الدور قولتلكم انا على الزيطة اللى ف المبنى بتاعى

وبالطو أبيض طالع وبالطو أبيض نازل
بس متوقفتش عند كده وسكت لأ بدأت احب ما اعمل حتى أعمل ما أحب
واقنع نفسي شوية بشوية انى اكتر واحدة اصلح للكلية اللى فيها دى
وعلشان كده ربنا اختارنى ليها لأنه هو أعلم بأنى فعلا أصلح للكلية دى عن غيرى
الكلية بائه
بتدرس علم نفس الطفل من وهو جنين وصغنن إلى أن يصل لسن ال 18 عام وشامل طبعا رياض أطفال
أنا مبسوطة بيه دلوقتى
بس اكتر حاجه ممكن تتعبنى وتنغص عليا حياتى إن الكلية صعبة ومحدش بيقدر وكله فاكر انها سهلة جدا مادامت عن الأطفال
وده التخلف بعينه لأن اى حاجه بتدرس حاجه عن الأطفال بتكون أصعب كتير من لو كانت بتدرس عن الكبار

نسيت اقولكم انا عملت ايه علشان اثبتلهم برضه انى مازلت مختلفة عنهم
وانى مش سهلة برضه ومش تافههة

اشتغلت صحافية بس مش كتير يمكن سنة او أقل من سنة كمان بس الحمد لله اثبت انى صحافية ناجحة ورئيس التحرير انبهر بيا
عملت حوارين صحفيين واحد مع المذيعة السكرة"عايدة سعودى" مذيعة على قناة المنوعات لقنوات النيل المتخصصة بتقدم برنامج" صحصح معانا" والتانى مع المذيع المتألق " أحمد عبدون" مقدم برنامج "عم يتساءلون" على دريم ودراستى العملى مخلتنيش اكمل بس مسكتش درست سيناريو وقولت لازم استغل اسلوبى وان القصة لو هتتقطع خالص فلازم السيناريو يخلى اسمى متألق ف الكتابة وان كانت الكتابة مش عن قصة من تأليفى انا بس اكيد دورى هيظهر، ودرست سينما...
وانا ف طريقى شدتنى السينما التسجيلية جدا يمكن اكتر من الروائية كمان
وقررت انى احترف السينما بس يعنى وانا بدرس لحد متخرج واتفرغ ليها تمام
وبعدها النصيب يحكم انا هشتغل ايه بالظبط
معلمة روضة ولا صحافية ولا معدة برامج ولا سيناريست ولا مخرجة ولا ايه بالظبط
لحد دلوقتى انا مش مقررة وسايباها للنصيب بس بجتهد ف كل مجال يشدنى ليه
واهو علم مش هيخسر اكيد هيكون له دور فى تنشئتى وتشكيل شخصيتى ف اى مهنة همتهنها بعد كده
أنا دلوقتى ف الفرقة التالتة
ادعولى يا جماعة وياريت تقولولى برضه رأيكم
http://doddosh.blogspot.com/
4/4/2007