10 - عفوا لوجوهكم

10- عفواااا لوجوهكم

عفوا

فالوجه وإن كرمه الله لكنه يرضى بمالايرضاه ضهرى من أسهم

عفوا إن تقيأت فى وجوهكم

فـ أنا اشعر بحالة من الغثيان كلما قابلت إنسياً فقد من آدميته الكثير ليصير أقرب إلى الثعبان يتلوى ويتلوى ويتلوى ..

فلماذا الالتواء إذا ماكان أقصر الطرق بين نقطتين هو الخط المستقيم؟!!.

هدى حسن محمد
11/12/2009

9- عفوا للسابقين

9-
عفوا للسابقين

عندما قالوا السابقين :لما تتلسع من الشوربة انفخ فى الزبادى
ولحسن نيتى الدائم تفهمت ان:

ما سيأتى بعد الشوربة ليس من الضرورى ان ننفخ فيه نظرا لأنه زبادى

فـ عفوا لرجل ادعى أنه زبادى فى حين أن شوربته كانت بركانا
وما كان جزائي بعدم نفخى فيه غير اننى توحوحت ..ومازلت أتوحوح

هدى حسن محمد
14-11-2009

8- عفوا لعشمى

8-

عفوااااااا لعشمى

عفوا لرجل توسمت فيه خيراً فأهانن

فإن توسمت خيرا فيمن لايستحق... فـ انتظر الكثير من الاهانة..

فــ عفوا لرجل..أعتقدت انه رجلا ..

فما لرجل حق أن يهين امرآة لجأت إليهَ

هدى حسن
10/10/2009

7 - عفوا للحشيش

7-

عفوا للحشيش

عفوا للمتشددين ... هذه مساحة للتهييس فحسب

و

عفوا للمهيسين.... لم أقصد إهانتكم فأنا منكم وإليكم

.........................................................................

في استيتيوس ع الفيس بوك خاص لصديق يدعى عبد الله كمال احد المهيسين قال

Abdalla Kamal الدنيا عاملة زى حتة الحشيش فى أيه بالظبط مش عارف"

فأجبته تهييسا:

....................................................................................................

7-عفوا للحشيش فما قصدت إهانته :

- الدنيا لفة ... والحشيش ملفوف

-كل متاخد منها نفسين.. ينقص من عمرك لحظتين

- يا تلفها وتحلق عليها .. يا متلحقشي ولا نفس فيها

- الدنيا مبتديش محتاج .. والحشيش مبيكيفش مسطول

- الدنيا تعيشك فوق الأرض.. والحشيش يعيشك فوق السحاب

- الدنيا تبرمك.... والحشيش تبرمه

..............قابلة للزيادة

تحياتى/ هدى حسن

11/9/2009

عفوا لـ إيماني

6-

عفوااااااااااااا

عفوا لـ إيماني

عفواً لرجلٍ رآني كالفراشة...ولم ألحظه

و

عفوا لرجلٍ .. تركنى كالفراشة...باحثة عن زهرة هي مستقرٍ لها

و

عفواً لرجل.. جعلنى اعترف انى كالفراشة.. ماتركت أثرا فيه

فـ عفوا لرجل يأتى يوما آمنت فيه أننى فراشة ..فلن ألحظه بينما أنا باحثة عن مستقر وما عاد لي أثراً

هدى حسن

عفوا..لإشتياقي

5-

عفوا ...لإشتياقي

عفوا لرجلٍ علمنى كيف أشتاق له دون أن أدرى

فقط

ليرى قطته تستعطفه إحتياجاً

فلا يعيرها إهتماماً

فعفوا ثلاثاً

الأولى

عفواً لك ... فلن ايأس اشتياقي

الثانية

عفوا... فلم استطع قول كل ماقالته فيروز فـ اكتفي بقولى: اشتقتللك

الثالثة

عفوا لكم.........لإطالة

هدى حسن

عفوا لمن لا يستحق

4-

عفوا لمن لا يستحق

عفوا لرجل أصابه من الغرور لـ يتعالى على سيد الخلق!!!1

حينئذٍ

لا تتعجب عند تعاليه على الخلق

ولا يستحق حتى أن يقال له عفوا

هدى حسن

عفوا لمجتمع شرقي

3-

عفوا لمجتمع شرقي

عفوا لرجلٍ ينتظر من الأنثى السذاجة

أقولها فى العلن

لست ساذجة

وبإعلانى هذا... اؤكد سذاجتى

فـ عفوا لمجمتعٍ شرقي يقلب الموازين

هدى حسن

عفوا لطلب العفو

2-

عفوا لطلب العفو

عفوا لرجل أعطانى الكثير واخطأت فى حقه فلم يعرف للعفو طريقا
فكيف له أن يطلب حينها العفو مِن مَن أعطاه
أكثر مما أعطانى هو

هدى حسن

عفوااااااااااااااااااا

عفوا

عفوا لرجل لم يفك شفرتي ولم يستطع قراءتي

فـ أنا والهيروغليفية له سواء

أعجبه زخرفتها ولم يحاول فهمها

عفوا

هدى حسن

بلالين.. بلالين

العنوان:

طراطير

لأ

اقصد بلالين

لأ..لأ

ممكن أومليت

يووووووووووه بائه

أى عنوان فيهم وخلاص

من طراطير لـ بلالين لـ حتى أومليت

مش فارقة كتير

التناكة والتعالى مفردات لشخصية تعانى من نقص ما

اللهم احفظنا من أولئك الناقصين

أحيانا تقابل من البشر ان صح التعبير وأظن فى صحته

تعانى من العقد والأزمات النفسية التى تجعلها تنتظر بنى ادم تطنطط عليه

وتجد ملاذها ف انها تتكلم بنظرة فوقية ليشبع احساسها بـ دونيتها

المشكلة لا تنحصر فى أنها اتنططت عليك بالفعل

بل المشكلة الأكبر أنك اعطيت تلك الفرصة الذهبية لشخصية كـ تلك

عفوا إن سميتها شخصية بالأساس

على كل الشخصيات المحترمة أن تعذرنى وتسامحنى إن سميتها بتسميتهم

لاحول ولا قوة الا بالله

نفسي اعرف بس

ايه السبب ان بنى آدم يفتكر نفسه حاجه وهو ولا حاجه بالفعل

والجميع يجمعون على ذلك

انه ولا حاجه

الله يمسيك بالخير يا محمود يا عسيلى

وانت بتقول

بلالين .. بلالين.. بلالين

منفوخين .. منفوخين.. منفوخين

ف اغنية اسمها طراطير

هما كذلك بالفعل

إهداء خاص

لكل طرطور وبلونة منفوخة قابلتها

لكم منى أرق التماسي

كركوبة

8/6/2009

لست مسحورة فحسب

تتساءل

هو ايه اللى بيحصل ده؟

عفوا

كنت عاوزة اكتب نوت اطلع فيه بركانى

فقد يثمر بالخيرات

بضعة كلمات مرتبة تحمل معنى يمسسنى بألم كلما اراه .. ابتسم

الى الآن البركان مازال ف معدتى .. فى جوفي... يغلى بعنفه في قولونى

لا اعلم جيدا .. هل بقلبي وجع فأتألم.. أم لتألمى ينزف قلبي وجعا

ذهب قوس قزح بألوانه التى جعلتنى أرى الوجود جميلا

لم تكن مجرد الوان اعشقها

انها طاقات ملونه فله من الالوان 36 لونا.....21 لون فى 3

كل لون له معنى وسحراً

لست مسحورة فحسب..انها الحمى

حمى الصدمة

تتردد ف أذنيَ حروفه المتناثرة بين هنا وهناك

كأنما بانتشارها يعلوا صداها

مش عاوز اعرفك تانى.. معدش ينفع خلاص

اشعر بهذيانى

بل اسمع تثاؤبكم تعبيرا عن مللكم منى

لا ..انه صراخكم : ارحمينا بائه.. مش فاهمين منك حاجه

لا اكتب هذه النوت كى تفهموا مايسري بداخلى

اقصد كل ما يتعثر بداخلى

دعونى اهذى كيفما اشاء

فما بقى لي غير الهذيان

وان لم يحلوا لكم هذيانى

دعونى وشأنى

كركوبة

29/5/2009

2:54 am

تخلص من حواسك

تخلص من حواسك

احتياج ف هوى ف اشتياق،، والنتيجة ضعف،،، لعنة الله عليه
ازاى تعمل بورام وتقفل عليك كل المصادر التى قد تجعلك تضعف وترتجف عشقا
حواسك،،،، حواسك هى الوسيط التى تجعلك تضعف
واحدة واحدة كده جرب تتخلص من حاسة من حواسك

غمض عنيك
متفتحهاش حتى لا تنبهر بما قد يتحكم فيك
صدقنى انك متشوفش افضل كتير من انك تشوف فى حالات كتير
خاصة عندما تشعر ان من هو امامك ،، قد يبهرك

أما بالنسبة لودانك بائه
فعدم الانصات ليس عيبا اذا ماكان سيوصلك لنفس النتيجة
وهى أن تضعف وتهتز يمكن لو مسمعتش صوت الرعد متخفش من البرد
ولو مسمعتش صوت من يجعلك تهتز يوميا فلن يعرف الفيبريشن لقلبك طريق

يمكن بدأت بالعينتين والودانين علشان هما اقوى ما يؤثر عليك
تبعا الى أن الرجل يحب بعينيه والمرأة تحب بأذنيها
فعلينا أن نتفق انهما يلعبان دورا ابن لذينة فى التأثير على قلبك

طيب هنيجى لمناخيرك- بين قوسين أنفك- مشيها،،، مراخيرك
ممكن تلعب دور فى التأثير على قلبك ده اكيد مش احتمال بدليل أنك قد تميز شخصا ببرفيوم يميزه
( برفيوم ايه بس مع مراخيرك دى متمشيش طبعا)
نصيغ الجملة تانى لتتماشي مع الحالة دى ،،،عفوا للتكرار
ده اكيد مش احتمال بدليل انك بتميز حد بريحة نفاذة اما ان تكون ريحة عرق وفى الحالة دى هتكره اللى جابوه
وده نوع من التأثير على مشاعرك برضه على فكرة اصل المشاعر مش حب بس
أو تميزه ببرفيوم مش هنقول بائه هيطلع من عنيك بس بيشد مناخيرك لما مناخيرك طولها يصبح طول المسافة التى قد تكون بينكما

ناقص ايه من الحواس؟؟

اللمس مثلا ،،،

نقول ايه عن اللمس؟
لأ عيب ،،، بلاش كده هيبقى فيها تحرش وحاجات وحشة
وفى اطفال ممكن تتدخل البلوج بلاش نسمم أفكارهم
الا اذا طالبتوا بانها تكون للكبار فقط

التذوق،،،

مش هحرض حد طبعا بأنه يتذوق ما قد يؤثر عليه بس ممكن ياكل اكله من ايديه
اكلة ماما.. اكلة زوجتك..
ممكن تاكل ايه تانى؟؟؟
اكتر من كده ممكن يجيلك مغص_ بين قوسين غمزة-بلاش تحف كتير من حبيبك؟

الحاسة السادسة

انك تقرا افكار من يؤثر عليك
او
ان تراه يقرأ أفكارك فيؤثر عليك أكثر وأكثر

ياترى بعد ده كله ؟؟
هتقدر تقفل حواسك الستة علشان متضعفش؟؟!!!؟؟

كركوبة

8/5/2009

حالة إكسبايرد

حالة إكسبايرد

Expired case

أحيانا تجد نفسك إذ فجأةً كده،،،، متلغبط

فى مغناطيس قوى بيشد كل المسامير اللى انت تعبت ف دقها لمسمرة بيبان قلبك

خوفا من الريح

اعترافا منى بالمثل القائل: الباب اللي يجيلك منه الريح ،،،، مسمر أهله واستريح

انتو عارفين بائه الريح لما بتيجى بتعمل ايه؟

اشي ترزيع وخبط ورقع وصداع ف دماغك من اللهفة إياها وصفافير فى ودانك من صراعك جواك خوفاً عليك من صدامات تلك البيبان

المهم نرجع لمرجوعنا ألا وهو :

المغناطيس إياه وهو بينزع منك كل قواك

كيف ستتعامل معه؟؟؟

هل ستستسلم سريعاً ؟!؟

أم تعلن أن لديك الكثير والكثير من المسامير التى تستطيع أن تدافع عن قلبك بها

آآآآآآآآآآآآآآآآآآآآآآه

إحدى ما يضعف قواك

السهر

نعم السهر،،، مش جديدة يعنى

بيشتت من تركيزك وتفكيرك ،،،،، وتلاقيه بيوهن من مقدرتك على إتخاذ القرار

خاصة ولو كان ذلك السهر

هو التفكير فى المشكلة مش فى عدم الوقوع فيها

عايزين نكون صريحين أكتر من كده مع نفسنا

هو احنا اللى بيقلقنا فعلا هو الخوف من الضعف وإعلان الهزيمة

أم

أن طول فترة انتظار حالة ذلك الذوبان سبب لنكتشف اننا صرنا حاله إكسيبايرد

واخرتها

العيال تزفك ف الشارع وتقول العبيط اهو

كركوبة

3/5/2009

الى قوس قزح

الى قوس قزح......اشتاق إليك

بقالى مدة كبيرة عاوزة اكتب بوستاية

بس بفقد اهتمامى اول ما اقعد ع الجهاز

بس حسيت النهاردة انى محتاجة ارتجل

مش عارفه هكتب ايه بس محتاجة اتكلم وخلاص

فرحت قوى لما بدأت احس بالشتا

رغم انى مشوفتش المطرة ولا مطرت على دماغى زى كل سنة

بس تفاءلت خيرا لما لقيت شارعنا مستحمى

ساعتها جه ف بالى قوس قزح اللى بلاحظه دايما بعد المطره بس لما يكون فى نهار

المرة دى مكنش فيه قوس قزح

و افتكرت قوس قزح لما كان له وجود فى سمايا

ولكنه....رافض الظهور

يمكن علشان حياتي،، عفواً،،

أقصد سمايا،، أصبحت معتمة أكتر

وتحتاج لبعض النهار

تساءلت ماذا لو أضأتها ببعض من الشموع السوداء

هل سيظهر قوس قزح

ايه ده واشمعنى سودا يعنى يمكن لانه اسم اكثر الافلام التى عشقتها منذ طفولتى

ونجاة بتغنى"ايه هو ده.. اشمعنى ده ارتحتله "

الظاهر كده انى بهذى وانها اعراض حمى ارتجالية

امشي بائه قبل ما اعك ف الكلام

تحياتى/ كركوبة

24/2/2008